OPTREDES 2021 - DV
Die deurwinterde liedjieskrywer en sanger, Jannie du Toit, neem vanjaar met
groot dankbaarheid, sy vyftig jaar van sing en musiek maak in oënskou met ‘n
musiekproduksie wat hy noem beSTEMmings.
Sy musiekreis het begin gedurende die Paasvakansie van 1971, toe hy saam met
een van sy niggies musiek gemaak het by Fanus Rautenbach se Flinkveriafees in
Bronkhorstbaai. Hy vier nou die groot mylpaal deur soveel te sing as wat
hierdie traumatiese tyd in die wêreldgeskiedenis hom toelaat, maar hy pak ook
projekte aan wat die boodskap uitstuur dat hy nie eers daaraan dink om op te
hou nie. Hy is steeds so passievol en entoesiasties oor musiek en taal as wat
hy in 1971 as jong RAU-student was, maar sy getroue ondersteuners asook kritici
glo dat Jannie nou artistiek gesproke op die kruin van sy loopbaan is: as
sanger, liedjieskrywer, kitaarspeler en verhoogkunstenaar. Hy word in sy feesvieringe
gesteun deur kykNET, Afriforumteater, die ATKV, die FAK en Maroela Media.
Jannie du Toit en sy geselskap vat vanjaar hande met die
Nasionale Raad van en vir Mense met Gestremdhede (NCPD) se Loslitdag
oftewel Casual Day, wat op 3 September plaasvind. Die fokus van die
samewerking is op die Raad se programme vir kinders met gestremdheid. Loslitdag-plakkers
sowel as alle inligting rondom dié alombekende insamelings-veldtog sal by alle
optredes beskikbaar wees. Jannie werk al
sedert 2007 saam met die NCPD om bewustheid by die publiek te help bevorder in
verband met die uitdagings wat mense met
gestremdhede in die gesig staar Jannie se huwelik (in 2018) met Therina
Wentzel, Nasionale Direkteur van hierdie liggaam, het sy betrokkenheid natuurlik
verstewig. Sien www.ncpd.org.za en maak
groot asseblief jou bydrae deur plakkers, hempies of hoede te koop.
AUGUSTUS
VRYDAG 20 AUGUSTUS
Verjaardagoptrede – Privaat funksie in
Middelburg
Jannie, Chanie Jonker (klavier en
akkordeon) en Annelie du Plessis-Hoberg (dwarsfluit)
SATERDAG 21 AUGUSTUS
Verjaardagoptrede – Privaat funksie
Agterplaas B&B Gastehuis, Melville
Jannie en Annelie du Plessis-Hoberg
(dwarsfluit)
Kunstefees in die kleine
Jannie beplan om
sy KUNSTEFEES IN DIE KLEINE, as deel van sy viering van vyftig jaar
met Afrikaanse musiek, in sy tuisdorp, Johannesburg, af te skop. Vier aanbiedinge word oor die
naweek van 27 tot 29 Augustus in die pragtige saaltjie van Jan Celliers
Laerskool in Parksig in samewerking met die ATKV beplan.
Die
minifees by Jan Celliers lyk soos volg:
Vrydag 27
Augustus 19h00
Bonjour Monsieur Brel onder regié van Juanita Swanepoel met Susan Mouton –
tjello en Chanie Jonker – klavier en akkordeon. Jannie speel die kitaar en sing
Brel se liedjies in vier tale: Frans, Afrikaans, Engels en Nederlands. Van die opnames uit hierdie
hoog aangeskrewe produksie word oor die afgelope paar jaar dikwels op Classic
FM 1027 gehoor. Optredes hier in Suid-Afrika, maar ook in Brel se heimat,
België, het gloeiende resensies ontvang. ‘n Ovation-toekenning by verlede jaar
se Makandla/Grahamstad Nasionale Kunstefees is nog ‘n pluimpie vir die
produksie. Dit is hartsmusiek uit die boonste rakke.
Saterdag 28
Augustus 15h00
Die maan deur ’n gaatjie in die nag is Jannie
se produksie wat in 2020 geloods is met sy gunsteling-liedjies van die
legendariese Marie Tredoux van Jacobsbaai aan die Weskus. Jannie word begelei
deur Chanie Jonker (klavier en akkordeon) en Annelie du Plessis-Hoberg (fluit
en perkussie). Die geliefde skrywer, Dana Snyman - 'n goeie vriend van Marie en
bewonderaar van haar liedkuns wat ook op Jacobsbaai woon - het tot die
produksie bygedra met stukkies prosa wat as bindteks op die verhoog gebruik
word. Die gesofistikeerde liedjies spreek van die aardsheid van die
Weskus, maar herinner aan die tekste van digters soos Boerneef en adem die
klanke van ‘n Nederlandse seemanslied of straatkafee. Enkele van Jannie se eie liedjies is ook by die program ingesluit.
Saterdag 28
Augustus 19h00
beSTEMmings – is die naam van die verhoogproduksie
wat hoogtepunte uit Jannie se loopbaan as liedjiemaker en opnamekunstenaar
saamvat. Die program bestaan uit Afrikaanse liedjies wat Jannie êrens oor die
afgelope vyftig jaar opgeneem of op die verhoog gesing het: liedjies van Jannie
en sy vriende. Met sy briljante begeleidende ensemble van Susan Mouton (tjello)
en Chanie Jonker (klavier en akkordeon) en sy kitaar, sorg Jannie vir ‘n
program waarin die emosies gedurig wipplank ry en artistieke integriteit die
botoon voer.
Die
ATKV, die kultuurorganisasie waarmee Jannie reeds sedert die sewentigerjare
bande het, tree op as borg vir hierdie produksie wat landswyd aangebied word en
later vanjaar op kykNET NOU te siene sal wees.
Sondag 29
Augustus 15h00
Soli Deo Gloria (Alleen
aan God die eer)
Jannie, Susan
Mouton (tjello), Chanie Jonker (klavier en akkordeon) en die a capella-groep
Breathe: Gabisile Nkosi, Sizwe Mondlane en Sandile Mcunu. Gaskunstenaar Renette
Bouwer (sopraan).
Die
titel van die program hou natuurlik verband met Jannie se viering van vyftig
jaar met musiek en sluit liedere in soos Jannie se alombekende Gee ons
Vrede, Koos du Plessis se Gebed en Somerkersfees, Pie Jesu
van Andrew Lloyd Webber en Christa Steyn se uitmuntende toonsettings van Jannie se skrifberymings. Benewens
die begeleide werk is daar ook a capella-sang uit die boonste rakke.
Renette en Jannie het as sangpaar bekendheid verwerf met hulle weergawe van Die
Eggo van jou oë, geskryf deur Gisela de Villiers, maar in hierdie program
word hulle stemme ten toon gestel oor die wye spektrum van klassieke tot ligter
musiek en spirituals. Die briljante a capella trio Breathe
was almal lede van Renette se UJ-koor en hulle werk reeds vyf jaar lank saam
met Jannie, veral in sy jaarlikse reeks Kersprogramme. Die produksie beloof om
besielende ervaring en waardige afsluiting van die Kunstefees in die Kleine te
wees.
SEPTEMBER
2021
Kunstefees in die kleine -
Afriforumteater, Brooklyn, Pretoria
Minder as ‘n kilometer van Jannie se
alma mater – Menlopark Hoërskool – word die hoogtepunt van die jaar se vieringe
op Sondag 5
September 2021 in die Afriforumteater in Pretoria aangebied. Dit behels drie
van sy produksies wat op dieselfde dag voor ‘n gehoor aangebied en opgeneem
word, met die oog op uitsending deur kykNET. Dié dag se program lyk soos volg:
11h00 DIE MAAN DEUR ‘n
GAATJIE IN DIE NAG – met Marie Tredoux se liedjies
Klavier: Chanie Jonker Fluit: Annelie du Plessis-Hoberg – sien die volledige
beskrywing hierbo by 28 Augustus.
15h00 beSTEMmings
Tjello: Susan Mouton Klavier:
Chanie Jonker
Dit is die vlagskip-produksie vir die
halfeeu-viering en Jannie het vir die aanbieding op 5 September sy
musiekvriende genooi om as gaskunstenaars saam met hom op te tree. Dit belowe
om ‘n feestelike geleentheid te word wanneer Jannie byvoorbeeld saam met Gisela
de Villiers haar komposisie Die eggo van jou oë sing
en saam met Coenie sy onsterflike Karoonag, waarby Jannie
tydens sy heel eerste opname van dié liedjie in 1983 ‘n tweede stem gesing het.
Daarby kom ook nog Anna Davel, Lochner de Kock, Laurinda Hofmeyr, twee van
Jannie se kollega’s in die sewentigs-sanggroep Trilogie – Andy Lubbe en Morg
Jacobs - en nog meer verrassings.
19h00 SOLI DEO GLORIA (Aan
God alleen die eer – met die oog op Jannie se halfeeu), ‘n program van
geestelike musiek met Renette Bouwer en die a capella-groep Breathe (Gabi,
Sizwe en Sandile) as gaskunstenaars. Sien die volledige beskrywing hierbo by 28
Augustus.
Om letterlik meer
kleur aan die dag te gee, word ‘n spesiale “Jannie du Toit”-roos wat Ludwig’s
Rose danksy die FAK gekweek het, op die dag bekend gestel, en Ken Forrester
wyne bied ‘n gratis wynproe aan.
Die opgedateerde weergawe van Jannie se
outobiografie wat in 2011 gepubliseer is oor sy 40 jaar met Afrikaanse musiek
– ONDERWEG – word ook by hierdie geleentheid opnuut
vrygestel. Die toevoeging in die nuwe uitgawe is ‘n hoofstuk wat heet “Nog
‘n dekade van genade”.
Omdat die 5de September volgens ons
beplanning volgeprop gaan wees met produksies waarmee Jannie sy vyftig jaar
vier, word beplan om alles wat daar gebeur met die hulp van Dapper Media – wat
ook die drie verhoogproduksies verfilm - regstreeks te
stroom. Dit beteken dat musiekentoesiaste teen ‘n klein betaling die hele dag
lank volledig deel sal kan wees van die feestelikheid. Om seker te
maak dat almal landswyd – en ook wêreldwyd – dit sal kan sien, sal die stroming
vir ‘n week lank lewendig gehou word. Drie van die produksies hierbo
genoem word op daardie Sondag by die Afriforumteater in Pretoria opgeneem met
die oog op beeldsending deur kykNet: Die Maan deur ’n gaatjie in die
nag, beSTEMmings,
Soli Deo Gloria
Geredigeerde weergawes sal natuurlik deur kykNet
uitgesaai word, terwyl die regstreekse stroming die volledige konserte – met al
die menslike foutjies – asook gesprekke met Jannie se
kunstenaarsvriende en ander gebeurlikhede sal insluit. Jannie se produksies
“Oesjaar” en “Kiekies – Lucas se Liedjies” saam met Thean Kotze sal aanlyn te
sien wees in die tye tussen die “lewendige” vertonings.
Die gratis wynproe van Ken Forrester-wyne sal
ongelukkig nie op die aanlyn-weergawe beskikbaar wees nie – jy sal maar self
moet opdaag☺
SIEN JOU GRAAG
STEEDS
SEPTEMBER - DV
'N LIEDJIE VIR JOU -
REEKS VAN 13 PROGRAMME OP KYKNET NOU
Vanaf
einde September tot net voor Kersfees word Jannie se bydrae tot Afrikaanse
musiek en kultuur geëer deurdat kykNet ‘n reeks van dertien
vollengte-programme - getitel ‘N LIEDJIE VIR JOU – op kykNet NOU
uitsaai.
Die skedule van
programme - tussen 50 en 80 minute lank - lyk soos volg:
§ Legendes –
Wynand Dreyer se dokumentêre program oor Jannie (2016);
§ Singstories –
‘n kykNET-program van gesprekke met Jannie, afgewissel met die uitvoering van
liedjies deur hom en sy ensemble – Susan Mouiton en Clinton Zerf - in 2014;
§ Skadu’s teen die
muur, ‘n huldigingsprogam aan Koos du Plessis (1993) onder regié van
Stephan Bouwer met Jannie, Christa Steyn en Marié du Toit;
§ Jannie
en die Tannie met inmenging (soos sy dit graag gestel het) van
Engemi Ferreira, ‘n viering van Christa Steyn en Jannie se
samewerking van 21 jaar (2007);
§ Onderweg (Jannie
se viering van sy musiekloopbaan van 40 jaar in 2011), met ‘n verhoogteks deur
PG du Plessis en regié deur Emma Bekker;
§ beSTEMmings –
Die vlagskip-produksie vir Jannie se viering van vyftig jaar, bestaande uit
Afrikaanse liedjies wat Jannie êrens oor die afgelope vyftig jaar opgeneem of
op die verhoog gesing het. Die gaskunstenaars wat op 5 September in die
Afriforumteater saam met Jannie gesing het, sal dan natuurlik ook op hierdie
TV-program te sien wees;
§ Bonjour Monsieur
Brel onder regié van Juanita Swanepoel met Susan Mouton – tjello
en Chanie Jonker – klavier en akkordeon. Jacques Brel se meesleurende liedjies
wat Jannie in Frans, Afrikaans, Engels en Nederlands sing;
§ My halfeeu met musiek – Jannie vertel sy
verhaal van die afgelope 50 jaar ingekleur met video-, klank- en beeldmateriaal;
§ Kiekies –
Lucas se liedjies – met Thean Kotzé. Lucas Maree as liedkunstenaar het min gelykes in Afrikaans.
Jannie du Toit en Thean Kotze herontdek sy verbeeldingryke kyk na die lewe en
laat die gehoor met persoonlike anekdotes iets beleef van sy uitsonderlike
menslikheid, taalvaardigheid, humorsin en kreatiewe gees;
§ Oesjaar –
met die musiek van Jannie se jongste komposisies van 2018 onder regié van Emma
Bekker;
§ Doep is nie dood nie,
saamgestel deur Carl Theunissen en Jannie du Toit met Coenraad Rall: klavier en
akkordeon en Susan Mouton: tjello;
§ Die maan deur ‘n
gaatjie in die nag
‘n Nuwe produksie oor die musiek van Marie Tredoux, wat in 2020
gedebuteer het en wat DV op 5 September 2021 opgeneem word met
Chanie Jonker: klavier en akkordeon; en Annelie du Plessis-Hoberg: dwarsfluit,
xilofoon en trompie;
§ In
Kersfeestyd 2021 – ’n Kersprogram met die a capella-groep Breathe en
sopraan Renette Bouwer as gaskunstenaars. Hierdie program word
volgens ons beplanning kort voor Kersfees uitgesaai. Die geliefde prediker en
teoloog, Dr André Bartlett, bind die program saam in die liturgie van ‘n
Kerssangdiens.
OKTOBER
SONDAG
3 tot SONDAG 10 Oktober
Die Maan deur ’n gaatjie in die nag by die Vrystaatfees
Jannie, Chanie Jonker (klavier), Annelie du Plessis-Hoberg (fluit en
slaginstrumente)
Ons optrede by die Vrystaatfees is
uitgestel na 2022
NOVEMBER
In
Kersfeestyd 2021
Jannie, Susan Mouton (tjello), Chanie Jonker (klavier) saam met die a capella
sanggroep Breathe (Gabi Nkosi, Sandile Mcunu, Sizwe Mondlane).
Daar word tans met gemeentes en ander
instansies onderhandel om hierdie program te finaliseer.
DESEMBER
WOENSDAG
1 tot WOENSDAG 22 DESEMBER 2021
Jannie beplan om op sy Kaapse toer in Desember hierdie jaar beSTEMmings saam
met Susan Mouton (tjello) en Chanie
Jonker (klawers)aan te bied, die vlagskip-produksie
waarmee hy 50 jaar met Afrikaanse musiek vier. Daar vind ook twee Kunstefeeste
in die Kleine op die toer plaas, waarby meer produksies betrokke sal wees.
Woensdag 1 Desember, 19h00
Naval
Hill Planetarium, Bloemfontein
beSTEMmings
Jannie,
Susan Mouton, Chanie Jonker
BESPREEK
by jannie@agterplaas.co.za of
whatsapp Jopie by 072 460 5568
Kunstefees
in die Kleine: Drostdyteater, Stellenbosch
Woensdag
8 Desember
Bonjour
Monsieur Brel
Jannie,
Susan Mouton, Chanie Jonker
Donderdag
9 Desember
Die
Maan deur ’n gaatjie in die nag
Jannie,
Chanie Jonker, Annelie du Plessis-Hoberg
Vrydag
10 Desember
beSTEMmings
Jannie,
Susan Mouton, Chanie Jonker
BESPREEK
by Computicket
Kunstefees in die Kleine: Die Koelkamers, Paternoster
Saterdag 11 Desember
15h00
Bonjour Monsieur Brel
Jannie, Susan Mouton, Chanie Jonker
Saterdag 11 Desember
18h00
beSTEMmings
Jannie, Susan Mouton, Chanie Jonker
Sondag
12 Desember
15h00
Die Maan deur ‘n gaatjie in die nag
Jannie, Chanie Jonker, Annelie du Plessis-Hoberg
Sondag 12 Desember
18h00
Doep is nie dood nie
Jannie,
Susan Mouton, Chanie Jonker
BESPREEK by www.diekoelkamers.com
Onderhandelinge is op die oomblik aan die gang met
venues en dorpe langs die Kaapse kus waar Jannie nou reeds 30 jaar lank dié tyd
van die jaar toer – sedert die vroeë negentigs, toe Christa Steyn sy
gereelde reisgenoot was.
Verdere inligting sal bygevoeg word,
sodra beskikbaar
OPTREDES 2021 - DV
Oppiwater
Kunstefees 23 tot 28 Januarie
KIEKIES
– LUCAS SE LIEDJIES
Jannie en Thean Kotze
Lucas Maree as liedkunstenaar het min
gelykes in Afrikaans. Hierdie program, Wat Jannie en Thean al sedert 2016
aanbied, herontdek sy verbeeldingryke kyk na die lewe en laat die gehoor met
persoonlike anekdotes iets beleef van sy uitsonderlike menslikheid en kreatiewe
gees. Soos Lucas se tekste is sy musiek ook ryk geskakeer en bied dit aan
die twee uitmuntende kunstenaars – die kombinasie van twee kitare en twee
stemme - oorgenoeg ruimte vir eksperimentering en verskeidenheid.
Vir besprekings sien www.oppiwater.co.za
Vir alle navrae oor Jannie se
optredes skakel Jopie Koen by 072-460-5568 en/of stuur eposse beide aan jopie@pierneefteater
en jannie@agterplaas.co.za